Acts 27
E Paulus i Lakea o Rom
1Na tahuna ri valongo mai a ngava pali ne mateu mete ge lakea o Itali, ▼ ri habi e Paulus turane huriki a vorakato ranga, ri habi na limane Iulius, a ubu na tara na vabinga ni gale a ‘Tara na Vabinga ne Kaiser Augustus.’ ▼ 2 cMete rike na aga tara i valai na tanga e Adramitium. A aga iea i vakarike a maka tulua ge taparaki na maka roa na tabeke ne Asia. E Aristakus, a bakovi o Tesalonika na tabeke ne Masedonia, i valai turane mateu.3Na parava muri mete bele o Sidon. E Iulius i rata kamumua e Paulus, i takia ge vano ge matai ranga turana, ri gi matakaria. 4Muri mete pasi tala vonga o Sidon, mete nunu tabukoi na dahana bodu e Saiprus, a vuhuna a vilu i pori valai na ngalane mateu. 5Mete padikudua a dari na tabeke ne Silisia e Pampilia, mete bele na tanga dagi e Maira na tabeke ne Lisia. 6Na tahuna mete bele vonga, a ubu i masia a aga o Aleksandria ge lakea o Itali, lakea mete rike vona. 7Mete pasi tala vonga, mete nunu makanukanu na parava ranga, a vuhuna mete vahori a vilu. Muri mete bele tabukoi na tanga e Snidus. A vilu i pori valai muga, mete keri ni nunu lokovonga vona a bala iea. Lakea mete palelea a mapana aga, mete nunu na tabeke i malilo na bodu e Krit, tabukoi na ruperena e Salmone, lakea mete lokovonga liu na tabeke tara na bodu. 8Mete nunu tabukoi na dahana bodu, mete vahori a vilu, muri mete bele vona a tanga ni gale ‘Roa Kamumu,’ i tabukoi na tanga dagi e Lasea.
9Mete maradoi hateka. Lakea mete hori vonga na parava ranga, mete davea a vilu ge pasipuru. Pali i uka ma i pasipuru. I tabukoi ngane a tahuna hale, i polo ne mateu vonga a Parava Niperemu. Lakea e Paulus i habia ne ria a niluhoi, 10i ta maea, “A masia a nihavai ne hita bara i vakabele a vuranga. Bara i mabubu a aga, i velu a maka tulua, i pasiri e huriki.” 11Pali a ubu i uka ma i longo maia e Paulus. I ramai kunana a ngavana matakari ne huriki a nuguvore, a tahona aga. 12A roa iea i uka ma i kamumu na tahuna na malangia, lakea e huriki lobo ri ngaru ni havai maia e Peniks, a roa na bodu e Krit, ra i ngalai a nirolona haro. Ria bara ri malaviriri, bara ri kapiloho vonga na tahuna na malangia.
A Vilu a Vala na Utu
13Na tahuna a vilu i ngalu valai tano, e huriki a nuguvore ri luhoi ta i malilo, lakea ri lalu rikea a niroka, ri nunu tabukoi na lavu ne Krit. 14Pali i uka ma i tabaka, a vilu dagi i pori valai meli na kurukuruna bodu. A vilu dagi iea ni gale a “taiava.” 15A taiava i pulo laea a aga i keri ni nunu. I nunu tamoro lokovonga kunana, i ramai a vilu. 16I naviri mia a bodu kiroko e Kauda na tahuna mi pasi lokovonga. Mi vakeri ni lalu rikea na aga a posi. 17Muri mi lalu rike visia. Muri mi kolotatea a aga. Ri mangenge ma ri gi heri na hini vorobike tabukoi na lavu ne Siritis, lakea ri lalu purua a sel, a vilu i vakanunu kunanea a aga. 18Na parava muri a taiava i pori hateka tabu, lakea ri vuroki tala a maka tulua. 19Na toluna parava ri vuroki tala a maka mahalana aga. 20Na parava i kupo i uka ma mi matai a haro a hada, a vuhuna i ratapile mia a taiava. Ngane mi luhoi a legea ne mia, bara mi vurua.21Na parava i kupo e huriki a bakovi i uka ma ri kani, lakea e Paulus i pesi rike na matane ria, i ta maea, “I muga mua bara mu longo mai iau, i uka ma si gi ha taroa e Krit, bara si made kamumu kunana. 22Pali ngane a taki tora mua, mu hatenono! I uka tara ne mua ge vurua. A aga kunana bara i mapua. 23Baroko na rodo a agelo na Vure i bele nau, ra Vure a kavurikea, iau a viri vona. 24 dA agelo i ta maea, ‘Paulus naha ni mangenge. Bara o pesi na matane Kaiser, ge pelekado ioe. Na nidodo na Vure kunana e huriki ri havai turamu i uka ma ri gi vurua.’ 25I mavonga mu kinigao, a vuhuna iau a luhoi a nitana Vure i vakalongo iau a agelo vona baroko, bara i bele muholi. 26 ePali hita, bara si koro na dahana bodu tara.”
27Na rodo i ravulu a polona i va i ratapile mavonga mia a vilu na maravana dari e Adriatik. Na kuru rodo e huriki a nuguvore ri luhoi ta mi tabukoi ni nunu dili na robo. 28Lakea ri topia na ngutuna mota a maki mava, ri voro purua, ri masia a maravana i puru na utu, a mita i ravulu va. Muri ri rata tabua, ri masia a maravana i puru na utu, a mita i ravulu tolu kunana. 29Ri mangenge ma ge bimomoa na rakaru a aga, lakea ri voro puru muri na kuli a niroka i va, ri hatenono ri dava a hini ge malaharere. 30Muri e huriki a nuguvore ri ngaru ni ha. Ri vakatavore purua na dari a posi, ▼ ri tamilalu ni voro puru a niroka na mapana aga. 31Pali e Paulus i takia a ubu turana e huriki a nugumaheto vona, “Re huriki a nuguvore nga bara ri ha, bara mu vurua.” 32Lakea e huriki a nugumaheto ri palakudu a mota ni kolotata a posi vona, i pasi tala a posi.
33Muga na hini ge malaharere, e Paulus i vakuku ria ri gi kani ranga maki ni kani, i ta maea, “Na parava i ravulu a polona i va, na tahuna mu dava a taiava ge pasipuru i uka ma mu kani. 34Ngane a taki mua, mu kani ranga maki ni kani, bara mu gao. Ra mua takutaku i uka ma ge velu tara lilina vune mua.” 35I taki loboa a ngava iea, i bole ranga bret, i kavurikea a Vure na matane ria, i keve, i vakatubu ni kani. 36A niluhoi ne ria i kamumu ngane, lakea ri kani. 37E huriki lobo ri rike na aga ri ala 276. 38Ri maru ngane, ri vuroki tala na dari a maka galesi na vit, ge maraha a aga.
A Aga i Koro
39E huriki a nuguvore ri mata rovia a robo na tahuna i palala a hini, pali ri masia a maloku i vona a lavu, lakea ri ngaru ni vakanunu rikea vonga a aga. 40Ri palakudu puru na utu a maka niroka, ri puga vuroki a mota ni kolotata a ginelu ▼ na aga. Muri ri turari rikea a sel na mapa, ta ri gi nunu dili na lavu. 41Pali na tahuna ri nunu lokovonga a aga i heri na hini i vorobike. A mapana aga i koro, i keri ni nunu, lakea a bokona dari i rere tagua a kulina aga, i vakatubu ni mapua.42E huriki a nugumaheto ri luhoi ni rabalaki e huriki a vorakato, ma ri gi ha. 43Pali a ubu ne ria i koi ni masia e Paulus ge mate, lakea i hatekakari ria vona a rabu ta ri gi ratea. Lakea i vakuku e huriki ri huru kilala ri gi to tala muga, ri gi huru dili na lavu. 44E huriki ranga ri gi tabuli langa na maka mavilana aga, ri gi huru dili. Na naro iea kunana e huriki lobo ri mahuri.
Copyright information for
BNP